வெலிக்கடை சிறையில் உயிரிழந்த குட்டிமணி தங்கத்துரை உள்ளிட்டவர்களின் 38 ஆம் ஆண்டு தேசிய வீரர்கள் தினம் நிகழ்வு யாழ் மாவட்ட ரெலோகட்சி அலுவலகத்தில் நடைபெற்றுள்ளது.
தமிழ் ஈழ விடுதலை இயக்கத்தின் 38வது தேசிய வீரர்கள் தினம் நிகழ்வு இன்றைய தினம் யாழ் மாவட்டத்தில் தமிழ் ஈழ விடுதலை இயக்கத்தின் மத்தியகுழு உறுப்பினரும்,யாழ் மாவட்ட அமைப்பாளரும் வலிகாமம் கிழக்கு பிரதேச சபைத் தவிசாளரும் ஆன தியாகராஜா நிரோஷ் தலைமையில் இடம்பெற்றது.
தமிழ் ஈழ விடுதலை இயக்கத்தின் மூத்த தலைவர்களான தங்கத்துரை, குட்டிமணி, ஜெகன் முன்னணிப் போராளிகளான தேவன், நடேசுதாசன், குமார், சிவபாதம், சிறிக்குமார், மரியாம்பிள்ளை,குமாரகுலசிங்கம் உள்ளிட்ட வெலிக்கடை சிறைச்சாலையில் படுகொலை செய்யப்பட்ட 53 அரசியல் கைதிகளின் நினைவுத தினம் இன்று அக் கட்சியின் யாழ்ப்பாண மாவட்ட அலுவலகத்தில் சுடரேற்றி மலர் தூவி, மலர் மாலை அணிவித்து அஞ்சலி நிகழ்வுகள் இடம்பெற்றன.
இந் நிகழ்வில் கட்சியின் மாவட்ட அமைப்பாளர் நிரோஷ்,ரெலோ இளைஞர் அணி தலைவர் சபா குகதாஸ்,தலைமை குழு உறுப்பினரும் பொருளாளருமான விந்தன்,யாழ் மாநகரசபையின் பிரதி முதல்வருமாகிய ஈசன்,நல்லூர் பிரதேச சபையின் உப தவிசாளரும்,யாழ் மாவட்ட இளைஞர் அணி தலைவருமாகிய ஜெய்கரன், முன்னாள் மாகாண சபை உறுப்பினர்கள், உள்ளுராட்சி மன்ற தவிசாளர்கள், உப தவிசாளர்கள் மற்றும் உறுப்பினர்கள் என பலரும் சுகாதார முறைப்படி கலந்து கொண்டு அஞ்சலி செலுத்தினர்.
